Reli ya Kijabe Yakaribia Kufunguliwa Tena Baada ya Mafanikio ya Jaribio la Mwendo

Taifa Leo news macharia David mashuara ya kibiashara

Baada ya karibu miaka miwili ya kusitishwa kwa huduma kufuatia athari za hali mbaya ya hewa, kufunguliwa tena kwa njia ya reli ya Uplands–Kijabe–Longonot sasa kunakaribia kutimia.

Shirika la Reli Kenya (KRC) limefanikiwa kufanya jaribio la mwendo (dry run test) katika kipande cha reli ya Metre Gauge Railway, kuthibitisha kuwa njia ya reli ya Kijabe iko tayari kurejesha huduma. Jaribio hilo ni hatua muhimu kuelekea kurejea kwa usafirishaji wa mizigo katika mojawapo ya njia muhimu zaidi za reli nchini.

Njia hiyo ya reli ilifungwa mwezi Aprili na Mei 2024 baada ya mvua kubwa kuliko kawaida kusababisha uharibifu mkubwa katika eneo la Kijabe, ambapo sehemu za reli zilisombwa na maji na kufanya njia hiyo isiweze kupitika. Kufungwa huku kuliathiri pakubwa usafirishaji wa reli kati ya Bandari ya Mombasa, maeneo ya ndani ya nchi na masoko ya kikanda katika Uganda, Sudan Kusini, Rwanda na Jamhuri ya Kidemokrasia ya Kongo.

Kwa kipindi kirefu, wafanyabiashara na wazalishaji walilazimika kutumia njia mbadala za usafiri, hali iliyoongeza gharama na kuchelewesha usafirishaji wa mizigo muhimu kama pembejeo za kilimo, mazao ya kilimo, bidhaa za chuma, mizigo ya makontena na mizigo mingine ya kawaida.

Jaribio la mwendo lililofanikishwa linaashiria mwanzo mpya.

Akizungumza wakati wa jaribio hilo, Mkurugenzi Mkuu wa Shirika la Reli Kenya, Bw. Philip Mainga, alisema hatua hiyo ni msukumo mkubwa kwa shughuli za reli na biashara ya kikanda.

“Hii ni hatua muhimu kuelekea kurejesha huduma za kawaida. Mafanikio ya jaribio hili yanathibitisha kuwa njia ya reli iko tayari kufunguliwa tena, jambo litakaleta afueni kwa wafanyabiashara wa Magharibi mwa Kenya na nchi jirani,” alisema Bw. Mainga.

Shirika la Reli Kenya limemaliza kikamilifu kazi za kurekebisha reli katika maeneo yaliyoharibiwa. Hata hivyo, kazi za ulinzi wa miundombinu na za kurekebisha mwelekeo wa mito zitaendelea huku shughuli za treni zikirejea, ili kuhakikisha usalama na uimara wa reli kwa muda mrefu.

Mara tu huduma zitakaporejeshwa, njia hii inatarajiwa kupunguza msongamano wa barabara, kushusha gharama za usafirishaji, na kurejesha ufanisi na uaminifu wa usafiri wa mizigo kwa reli katika eneo la Afrika Mashariki.

Kwa kukamilika kwa jaribio la mwendo, Kenya Railways imesema kuwa ni masuala machache tu ya mwisho ya kiutendaji yaliyosalia kabla ya treni za mizigo kurejea kupitia Kijabe, na hivyo kuunganisha tena pwani ya Kenya na maeneo ya ndani ya nchi pamoja na kuimarisha nafasi ya reli katika biashara ya kikanda.